ஜூலை–11 இணையவழி சிறப்புக் கருத்தரங்கம் !!

 AIBDPA TN* 

 ஆவணமாக அமைந்த அகத்தின் அதிர்வுகள்…

ஜூலை–11 இணையவழி சிறப்புக் கருத்தரங்கம்*

ஜூலை–11 என்பது இந்திய தொழிலாளர் இயக்க வரலாற்றில் அழியாத முத்திரை பதித்த நாள். 

1946 தபால்–தந்தி ஊழியர்களின் வீரப் போராட்டமும், 1960 மத்திய அரசு ஊழியர்களின் வரலாற்றுச் சிறப்புமிக்க வேலைநிறுத்தமும், உழைக்கும் மக்களின் உரிமைப் போராட்ட வரலாற்றில் பொன்னெழுத்துக்களால் பொறிக்கப்பட்ட நிகழ்வுகள். 

அந்தத் தியாக மரபை நினைவுகூரவும், அதன் போராட்டப் பாடங்களை இன்றைய தலைமுறைக்கு எடுத்துச் செல்லவும், AIBDPA தமிழ்நாடு மாநிலச் சங்கம் ஜூலை 11 அன்று இணையவழி சிறப்புக் கருத்தரங்கை சிறப்பாக ஏற்பாடு செய்தது.

1960 வேலைநிறுத்தப் போராட்டத்தில் நேரடியாகப் பங்கேற்று சிறை சென்று  அதன் விழுப்புண்களை வாழ்நாள் பெருமையாகச் சுமந்து நிற்கும் *சென்னை தொலைபேசி தோழியர் விமலா ராவ்*, மேலும் AIBDPA-வின் மத்திய சங்க காப்பாளர், தொலைத்தொடர்பு ஊழியர் இயக்கத்தின் தலைசிறந்த போராளியுமான *தோழர் V.A.N. நம்பூதிரி* ஆகியோர் கருத்துரையாற்ற அழைக்கப்பட்டிருந்தனர்.

11.07.2026 பிற்பகல் 3.00 மணிக்கு கருத்தரங்கம் தொடங்கியது. மாநிலத்தின் பல்வேறு மாவட்டங்களிலிருந்து தோழர்கள் சாரை சாரையாக இணையத்தில் இணைந்து நிகழ்வை சிறப்பித்தனர். 

மாநிலத் தலைவர் தோழர் சி. ஞானசேகரன் தலைமை வகித்தார். மாநிலச் செயலாளர் தோழர் ஆர். ராஜசேகர் வரவேற்புரையாற்றி, ஜூலை–11 போராட்டங்களின் வரலாற்றுப் பெருமையையும், அவற்றின் இன்றைய பொருத்தத்தையும் எடுத்துரைத்தார்.

தனது 94-வது வயதிலும் இளமைத் துடிப்பும் போராட்ட உறுதியும் மாறாமல் பங்கேற்ற தோழியர் விமலா ராவ், 1960 வேலைநிறுத்தப் போராட்டத்தின் மறக்க முடியாத அனுபவங்களையும், அன்றைய தியாக உணர்வையும், தொழிற்சங்கத்தின் மீதான அசைக்க முடியாத நம்பிக்கையையும் நெகிழ்ச்சியோடு பகிர்ந்துகொண்டார். "தனிநபரால் முடியாததை, ஒற்றுமை கொண்ட சங்கம் சாதிக்கும்" என்ற அவரது ஆழமான கருத்து, பங்கேற்ற ஒவ்வொருவரின் உள்ளத்திலும் அழியாத முத்திரை பதித்தது.

அதைத் தொடர்ந்து உரையாற்றிய தோழர் V.A.N. நம்பூதிரி, சுமார் 55 நிமிடங்கள் அனைவரையும் சிந்தனையின் உச்சிக்குக் கொண்டு சென்றார். 1946 மற்றும் 1960 போராட்டங்களின் வரலாற்றுப் பின்னணி, அவற்றின் இலக்குகள், வெற்றிகள், அதன் மூலம் தபால்–தந்தி மற்றும் மத்திய அரசு ஊழியர்கள் பெற்ற வரலாற்றுச் சாதனைகள் ஆகியவற்றை ஆவண ஆதாரங்களுடன் தெளிவாக விளக்கினார்.

அத்துடன், தற்போதைய அரசியல்–பொருளாதாரச் சூழலில் ஓய்வூதியர் இயக்கமும் தொழிற்சங்க இயக்கமும் எதிர்கொள்ளும் சவால்கள் என்ன, அவற்றை முறியடிக்க வேண்டிய செயல் திட்டம் என்ன, எதிர்காலப் போராட்டங்களை எவ்வாறு கட்டமைக்க வேண்டும் என்பதையும் தெளிவாக எடுத்துரைத்தார். வயது கூடினாலும், போராட்டக் களத்தில் பழகிய சிங்கத்தின் கர்ஜனை மங்குவதில்லை என்பதை அவரது உரை மீண்டும் ஒருமுறை அனைவருக்கும் உணர்த்தியது.

கருத்தரங்கில் BSNLEU அகில இந்திய உதவிப் பொதுச் செயலாளர் தோழர் S. செல்லப்பா, AIBDPA மத்தியச் சங்க நிர்வாகிகள் தோழர்கள் S.மோகன்தாஸ், N.குப்புசாமி, A.குடியரசு, பெர்லின் DRPU தலைவர் தோழர் R.இளங்கோவன், AIRRF தலைவர் தோழர் ரபேல், 

ஆகியோருடன் மாநிலச் சங்க நிர்வாகிகள், மாவட்ட மற்றும் கிளைச் செயலாளர்கள், சென்னை தொலைபேசி தோழர்கள் உள்ளிட்ட மொத்தம் 128 தோழர்கள் கலந்து கொண்டு நிகழ்வை வெற்றிகரமாக மாற்றினர்.

இறுதியாக மாநிலப் பொருளாளர் தோழர் A.இளங்கோவன் நன்றியுரை வழங்கினார்.

ஜூலை–11 போராட்ட மரபை நினைவுகூர்ந்த இந்த இணையவழி கருத்தரங்கம், வெறும் சம்பிரதாய நிகழ்வாக அல்ல; வரலாற்றை நிகழ்காலப் போராட்டங்களுடன் இணைத்து, எதிர்காலச் செயல்பாடுகளுக்கான புதிய உறுதியை உருவாக்கிய ஓர் ஆவண நிகழ்வாக அமைந்தது. 

இந்த நிகழ்வை வெற்றிகரமாக்கிய அனைத்து தோழர்களுக்கும் தமிழ்நாடு மாநிலச் சங்கம் தனது புரட்சிகர வாழ்த்துகளையும் நன்றியையும் தெரிவித்துக் கொள்கிறது.

தோழமையுடன்,
ஆர். ராஜசேகர்
மாநிலச் செயலாளர்
AIBDPA – 
தமிழ்நாடு மாநிலம்
11.7.26